الصفحة دي بتشرح إيه البيانات اللي بتوصلنا لما تكلّم مشروع بيستخدم Swivto، وبنعمل بيها إيه.
Swivto بيعمل إيه
بنجمع رسايل المشروع من واتساب وماسنجر وإنستجرام وشات موقعه في مكان واحد، وبوت بيرد على الأسئلة المتكررة، وموظفين المشروع بيكمّلوا المحادثة.
إيه اللي بيوصلنا منك
- الرسايل اللي بتبعتها للمشروع، يعني الكلام والصور والتسجيلات الصوتية والملفات.
- التعليقات اللي بتكتبها على بوستات المشروع على فيسبوك أو إنستجرام، علشان البوت يرد عليك تحت التعليق وفي رسالة.
- اسمك ورقمك أو معرّف حسابك على التطبيق، وصورة البروفايل لو ظاهرة.
بنستخدمها في إيه
- علشان موظفين المشروع يشوفوا رسالتك ويردّوا عليك.
- علشان البوت يرد على سؤالك. نص رسالتك بيتبعت لخدمة ذكاء اصطناعي تكتب الرد، ومش بيتستخدم في أي حاجة تانية.
- لو بعت تسجيل صوتي، بيتبعت لخدمة بتحوّله لكلام مكتوب علشان البوت يفهمه ويرد.
- لو بعت صورة منتج، بتتبعت لخدمة الذكاء الاصطناعي علشان البوت يلاقي المنتج اللي شبهها عند المشروع.
مين بيشوفها
- المشروع اللي كلّمته.
- فريق Swivto، لو محتاج يصلّح مشكلة أو يساعد المشروع.
- الشركات اللي بتشغّل الخدمة معانا، وهي الاستضافة وخدمات الذكاء الاصطناعي وتحويل التسجيل الصوتي لكلام.
ما بنبيعش بياناتك، وما بنستخدمهاش في إعلانات.
بياناتك ممكن تطلع برا مصر
بعض الخدمات دي شغالة برا مصر. خدمة الذكاء الاصطناعي الاحتياطية في الصين، وبنستخدمها بس لو الأساسية وقفت. وتحويل التسجيل الصوتي لكلام في أمريكا. اللي بيوصلهم نص الرسالة أو التسجيل الصوتي أو الصورة اللي بعتّها بس، علشان البوت يرد.
بنحتفظ بيها قد إيه
طول ما المشروع مشترك معانا، أو لحد ما تطلب نمسحها. لو المشروع وقّف اشتراكه، بنمسحها بعد 90 يوم. والتعليقات اللي البوت رد عليها بنمسح سجلها بعد 90 يوم.
الموقع ده
- لو كلّمتنا على واتساب، بيوصلنا رقمك واسمك ورسالتك، ونستخدمهم علشان نرد عليك بس.
- لو كلّمت الشات اللي على الموقع، رسايلك بتوصلنا وبيرد عليها البوت بنفس الطريقة اللي فوق. والمحادثة بتتحفظ على جهازك يوم واحد، علشان لو رجعت تلاقيها.
- المشاريع المشتركة معانا ممكن تكتب رأيها، وساعتها اسم المشروع والتقييم والتعليق ولينكاته بيظهروا على الصفحة الرئيسية.
- الموقع ما بيستخدمش cookies للتتبّع، ومفيهوش إعلانات.
تطبيق Swivto للموبايل
التطبيق لموظفين المشاريع المشتركة معانا بس، علشان يردّوا على العملاء من الموبايل. مفيش فيه تسجيل حساب جديد، والحساب بيعمله المشروع أو إحنا.
- إيميلك وكلمة السر بيروحوا لسيرفر Swivto بس، علشان تدخل.
- علشان توصلك الإشعارات، الموبايل بياخد رمز من Firebase Cloud Messaging (خدمة Google للإشعارات). الرمز ده بيتحفظ على سيرفرنا، ومعاه اسم الموبايل وموديله ورقم تعريفي ليه. الإشعار فيه اسم العميل وأول جزء من رسالته.
- الكاميرا والصور والميكروفون بيشتغلوا بس لما تختار تبعت صورة أو ملف أو تسجيل صوتي، واللي بتبعته بيروح للعميل في المحادثة.
- المحادثات بتتحفظ على الموبايل علشان تفتح بسرعة. لما تعمل تسجيل خروج بتتمسح من الموبايل، وتفضل محفوظة عندنا.
- التطبيق ما بيجمعش مكانك ولا جهات الاتصال، ومفيهوش إعلانات ولا أدوات تتبّع.
- لو عايز تمسح حسابك كموظف، الخطوات في صفحة حذف البيانات.
حقك
تقدر تطلب نسخة من بياناتك أو إننا نمسحها في أي وقت. الخطوات في صفحة حذف البيانات.