دي الشروط بين Swivto والمشروع المشترك معانا، بكلام بسيط.
إحنا بنعمل إيه
- بنجهّز صندوق رسايل واحد لواتساب وماسنجر وإنستجرام وشات موقعك.
- بنربط بوت بيرد على أسئلة عملائك من منتجاتك ومعلومات مشروعك.
- بندرّب فريقك، ونفضل مسؤولين عن الصيانة والدعم طول الاشتراك.
إنت بتعمل إيه
- بتدّينا منتجاتك ومعلومات مشروعك صح، وبتبلّغنا لو حاجة اتغيّرت.
- بتلتزم بسياسات Meta وواتساب في الرسايل اللي بتبعتها.
رسوم واتساب
رسوم رسايل واتساب بتدفعها لـ Meta مباشرة من حسابك وبالكارت بتاعك، مش من خلالنا. Meta بتحاسب على الردود كمان، وبنحسبها معاك قبل ما نبدأ.
الحسابات
حساب Meta Business ورقم واتساب والصفحات بيفضلوا باسمك إنت.
البوت
البوت بيرد من المعلومات اللي إنت بتدّيها لنا، وأي سؤال مش عارف يرد عليه بيحوّله لفريقك. لو سعر أو معلومة اتغيرت ومحدّثتهاش، البوت هيرد بالقديم. البوت بيرد على العميل الواحد لحد 20 رد في اليوم (15 في الباقة الكبيرة)، وبعدها بيحوّله لفريقك.
لو Meta قفلت رقم أو صفحة
مش هنكون مسؤولين لو Meta قفلت رقم أو صفحة بسبب سبام أو مخالفة لسياساتها.
بياناتك
بيانات مشروعك ومحادثاته ملكك. لو وقّفت الاشتراك، بنسلّمك نسخة منها لو طلبتها. لو الاشتراك فضل متوقف 90 يوم، بنبعتلك تحذير وبعدين بنمسحها.
السعر والدفع
- السعر والباقة بنتفق عليهم معاك ونكتبهم قبل ما نبدأ.
- التشغيل والتدريب جوه الباقة من غير رسوم. لو محتاج نجهّز منتجاتك من الصفر (نكتبها ونصوّرها)، بنتفق على سعرها لوحدها.
- الاشتراك بيتدفع مقدم (شهر أو 3 شهور أو سنة)، وميعاد الدفع ثابت، يعني لو بتدفع يوم 5 بيفضل يوم 5. ولو دفعت متأخر في أيام السماح (مثلًا يوم 7)، الشهر الجديد من يوم 5 برضه، لأن الخدمة كانت شغالة. ولو دفعت بعدها، الشهر الجديد بيبدأ من يوم ما دفعت. والتجربة المجانية لو خلصت من غير اشتراك، بياناتها بتتمسح بعد 30 يوم.
- السعر اللي دفعت بيه ثابت لحد آخر المدة اللي دفعتها. لو أسعارنا اتغيّرت، الدفعة الجاية بتبقى بالسعر الجديد.
- لو لغيت في نص المدة، الاشتراك بيفضل شغال لآخرها، ومفيش فلوس بترجع عن الأيام الباقية، ولا عن باقي السنة في الاشتراك السنوي.
- لو الدفع اتأخر، أول 3 أيام كل حاجة بتفضل شغالة، وبعدها البوت بيقف والرسايل بتوصل لفريقك بس، وبعد 14 يوم من ميعاد الدفع الحساب بيتقفل لحد ما يتدفع. بياناتك بتفضل محفوظة.